Guías de lectura: curso 2024-2025

 Por se foran de utilidade deixamos o enlace as guías de lecturas e máis da excursión realizada no curso.

Guías de Lectura Laretas:

- Los dioses Mienten

- O Segredo de Al´Eume

- Redes

Guías de Lecturas Laretas Adultos:

- Berta

- A Noite do Oso

- Arrugas

- Asasinato na casa rosa

- El archipiélago del perro

- Persépolis

Guía da Andaina:

- Fragas do Eume e Pontedeume

Andaina: As fragas do Eume e Pontedeume

Aproveitando que unha das lecturas do Club deste curso foi O Segredo de Al´eume de Pilar Ortega, decidimos visitar as Fragas do Eume e máis Pontedeume.

Polas Fragas fixemos un percorrido circular guiados por Xulián que nos ensinou e aprendimos abondosas cousas de etnografía, xeoloxía, fauna e flora do lugar. Quedamos abraiados coa cantidade e diversidade de fieitos que hai.

Unha vez no mosteiro descubrimos a historia de San Rosendo e máis o seu anel que cal soldadiño de chumbo reapareceu nun salmón. A camiñada co que petaba o sol (sobre todo á volta) foi dura!

Despois dunha comida de convivencia á sombra dos pinos da praia da Magdalena de Cabanas fixemos desta volta unha ruta urbana pola vila de Pontedeume.

Silvia, a nosa guía, explicounos a historia e o desenvolvemento da vila explicándonos a importancia das sardiñas, dos antigos oficios, da pote, da muralla, dos Andrade e máis do arcebispo Rajoy. Rematamos a visita subindo á Torre dos Andrade (sede da oficina de Turismo) e desde o alto puidemos esculcar todo o territorio que pertencía a antiga familia dos Andrade.

Día intenso e caluroso!

O dilema das redes

Para rematar o curso e relacionado coa nosa derradeira lectura deste curso, Redes de Eloy Moreno, proxectamos o documental O dilema das redes. A pesar de estar realizado no ano 2020 e de centrarse fundamentalmente no Facebook, deixa entrever perfectamente como funcionan todas as redes sociais actualmente: Instagram, tik-tok, X... para os que somos simplemente productos a vender e dos que sacar aproveitamento.

 

A pesar de durar practicamente todo o tempo que tiñamos para a sesión, xerou un intenso (aínda que corto que tiñamos clase) debate ao finalizar.

Despedida e peche do club de lectura de adultos

Como a comida e a compaña marida ben coa lectura e os libros, decidimos despedir o curso cunha cea. Alí tivemos tempo de falar, entre outras moitas cousas, de que libro nos gustara máis, cal foi o que non nos gustou, cal nos supuxo unha maior dificultade, e incluso comentáronse propostas para o curso vindeiro. 

A cousa parece que marcha; xa tiñan présa por coñecer a data de comezo do novo curso e a da próxima reunión do Club.

Persépolis

Persépolis de Marjane Satrapi foi a derradeira lectura do club de lectura de adultos deste curso. Sorprendeu e gustou. A utilización do blanco e negro nas viñetas, a expresividade destas, a temática, o desenvolvemento da historia persoal da protagonista e da familia, o contexto histórico, a realidade do país, o confrontamento entre civilizacións, as reflexións persoais... Un libro para coñecer e para aprender. Un libro que nos mostra, por se non o tiñamos claro coa nosa propia historia, que as distopías poden non estar tan lonxe da realidade.

Decidimos desta volta retratarnos coa montaxe que fixemos este curso para commemorar o 8 M.

Redes

Redes de Eloy Moreno foi a derradeira lectura deste ano coa rapazada da ESO. Eliximos a lectura porque gustáranos moito Invisible, porque trata o tema das redes sociais e porque gústanos ler novidades frescas.

A verdade é que o libro daría para varios días e varias reunións de conversa: redes sociais, "influencers", adicción, soidade, acoso, tristeza, procura da felicidade, o valor dos "likes"... Unha chea de temas!

A pesar de que gustou as constantes regresións e progresións no tempo dificultoulle a lectura a algúns.

Afortunadamente parece que non temos a ninguén que sufra de Nomofobia, xa que comentamos tamén a desconexión do día do apagón e a ninguén lle supuxo maior problema.

O apagamento

O luns 28 de abril de 2025 tiñamos reunión sinalada para falar de El Archipiélago del Perro de Philippe Claudel.

A pesar do apagamento e posto que facía un día magnífico e unha temperatura máis que agradable abandonamos o interior do centro para, como antano, sacar os bancos e as cadeiras e poñernos a rexoubar á porta do Instituto.

O libro non gustou por igual pero si coincidimos todas na dureza do relato. Os protagonistas, as circustancias, o feito co que arranca o libro, a solución a ese feito, as consecuencias que se derivan... Analizamos polo miúdo e compartimos as opinións, as sensacións e o resaibo amargo que nos deixou o relato.

E a pesar das ausencias (por cuestións mecánicas ou por imposibilidade de comunicación) resultou unha sesión ben agradable.

Stand by me

Por duración, debido ao tempo limitado que temos ao mediodía, escollemos un filme dos anos 80, Stand by me de Rob Reiner, un clásico do cine de aventura e adolescencia, baseado nunha novela do escritor de misterio e terror, Stephen King.

Foi curioso descubrir, pola reacción da rapazada, o politicamente incorrectas que poden resultar hoxe en día algunhas películas (o vocabulario, as actitudes, o comportamento, as maneiras dos protagonistas....) aínda que isto non lle resta validez á obra.

Un grupo de rapaces decide ir en busca do corpo doutro rapaz que saben morto á beira da vía do tren. Atoparán o corpo pero tamén se atoparán a eles mesmos nunha viaxe na que descubrirán e terán que loitar contra os seus medos, as súas teimas e as expectativas que pesan sobre cada un deles.

Vale a pena vela aínda que só sexa pola música e máis por esa conversa entre Gordie e Chris, dúas das personaxes protagonistas:

- Crees que soy un bicho raro?

- Y que? Todo el mundo lo es!

Asasinato na Casa Rosa

Cambiamos de tercio e botámonos de cabeza á novela negra. Lemos a última obra de Arantza Portabales, Asasinato na Casa Rosa. Gustou o libro e gustou o xénero a pesar de ser o libro máis extenso que lemos ata o momento. Pero concordamos en que resultou sinxelo de ler e que se mantivo o misterio ata o final.

O poder dos cartos, o poder da familia, a desigualdade na xustiza, os intereses e as motivacións de cadaquén, as diferentes situacións persoais... deron para falar longo e tendido sobre o libro.

Ao final resulta que ser rico non é tan bo como puidera parecer!!

O Segredo De Al´eume

Coa falta de parte do alumnado (unha por enfermidade, pobre, e outra por estar de viaxe en París, non pobre) tivemos a sesión de reunión do club de lectura deste trimestre. Eliximos un libro que mestura intriga e aventura, que nos resultou sinxelo e entretido e que gustou maioritariamente. O segredo de Al´eume de Pilar Ortega.

Narra a historia dunha adolescente que agocha un segredo (aínda que somos coñecedores del dende o principio) e de como intenta resolvelo buscando outro segredo de características ben diferentes.

Deu para comentar sobre as actitudes das persoas adultas do relato, sobre as mentiras, os ciumes, a carraxe, os medos, a honestidade, o valor da amizade, a utilización do móbil, as redes sociais e as cousas que nos parecen incribles na ficción pero que a realidade supera, as veces, con creces.

Arrugas

Desta volta estrenámonos no mundo da nóvela gráfica posto que parte dos integrantes do grupo, nunca lera ningunha. Eliximos para isto Arrugas de Paco Roca, unha historia que, por sinxela, non deixa de ser moi emotiva.

Que o protagonista fora ingresado nunha residencia a causa do Alzheimer fixo que gran parte do debate se centrara neste tema xunto coa preocupación polas enfermidades relacionadas coa vellez. Os distintos tipos de relacións entre as familias, a falta de espacios e actividades dirixidas á xente maior, a ausencia de políticas serias respecto ao futuro dun continxente de poboación que medra cada día máis, o envellecemento activo... Quizá a idade media do grupo levounos a debatir longa e amplamente.

Abel Tomé

Onte visitounos Abel Tomé, autor da última obra lida, A Noite do Oso, oriúndo do concello e, ademáis, exalumno dos primixenios tempos do centro. Convidamos e participou xente allea ao centro que estaba interesada na charla posto que tamén lera o libro.

Case non puido nen presentalo porque o asaltamos, case dende o principio, con todas aquelas dúbidas derivadas das nosas especulacións, teorías, hipóteses e conxeturas que nos xurdiran segundo iamos lendo o libro e que xa debatíramos apaixonadamente na reunión anterior.

Quedou patente a importancia da interpretación que as persoas que len un libro fan, á hora de darlle unha volta a todo aquilo que rodea a historia principal.

Aínda así quedou contento que prometeu volver!

Robot Dreams

A amizade e a súa importancia reflíctea bastante ben unha pelicula do ano pasado que gañou premios en diferentes certames como o festival de cine de Sitges ou nos premios do cine europeo, Forqué, Goya ou Feroz.

Asi como nos animamos co Manga, así tamén nos animamos co cine de animación: Robot Dreams que narra a relación de amizade (as complicacións e a evolución) entre un can e un robot. Un acerto aínda que o feito de ser muda non gustou a todo o mundo.

A Noite do Oso

A noite do Oso de Abel Tomé, foi o libro escollido como segunda lectura do Club de Lectura de adultos. O feito de que o autor sexa outiense e de que estudiara no propio instituto (fai anos, claro), animou un pouco a escoller tamén a lectura.

Como a tarde estaba fría, veu moi ben que acompañáramos a sesión dun chocolate quente e de algún que outro doce para conmemorar o Nadal que se aproxima xa.

Houbo disparidade de opinións con respecto ao libro, e houbo moitas máis respecto á interpretación da historia que nos conta nel. Dúbidas, especulacións, historias inacabadas, personaxes misteriosos...

Cando nos visite o autor vai ter que contestar a moitas preguntas!

Los Dioses Mienten

É o suxerente título do manga co que comezamos as sesións do Club de Lectura co grupo de alumnado da ESO. E para animarnos, nada mellor que unha comida de confraternización e benvida na cafetería do centro. A continuación pasamos xa a biblioteca para realizar a reunión.

Parece que comezamos con bo pé, porque maioritariamente gustou aínda que, coma sempre houbo queixas respecto ao final e é que non gustan os finais abertos.

Unha boa e dura historia, sobre todo, pola situación na que viven dous dos protagonistas. O cancro, a morte, o abandono, a ocultación das verdades, a importancia da familia e a comunicación, a responsabilidade no fogar, o consumismo, a soidade, o medo, o amor, a tristeza... son temas que trata o manga e sobre os que debatimos na reunión. Pasouse o tempo voando.

A ver se acertamos tamén co seguinte.