Comezamos....

Comezamos co Club de Lectura este curso e, como novidade, conseguimos facer un grupo de lectura de adultos. Entre profesorado, ex-profesorado, persoal non docente do centro e ex-alumnado de adultos de noite, reunímonos 16. Un bo número para comezar. Sigue aberto a que máis xente se incorpore cando as obrigas laborais ou familiares o permitan.

Non acabamos de definir a periodicidade das reunións porque entendemos que debe estar en base á esixencia da lectura que vaiamos realizar.

 

A primeira elixida é Berta de Concha Blanco. A reunión terémola o 28 deste mes para falarmos do libro e, afortunadamente, imos contar coa visita da autora para o 11 de novembro.

Parece que a cousa vai encamiñada. Iremos informando.

GUÍAS de LECTURA: curso 2023-2024

Por se fosen de utilidade deixamos os enlaces aos materiais elaborados este curso: as guías de Lectura e da viaxe realizada polo club.

GUÍAS dos LIBROS

• A SILENT VOICE
• BE WATER
• A MALFERIDA

GUÍA DA VISITA CULTURAL

• CAMIÑADA: SAN CIBRAO E VIVEIRO

CAMIÑADA: San Cibrao e Viveiro

Para cumprimentar a autora do derradeiro libro de lectura deste curso, decidimos visitar a súa terra, San Cibrao e máis a cidade na que se desenvolve a obra, Viveiro.

En San Cibrao visitamos o museo provincial do mar, vimos a Maruxaina, a mina da II guerra mundial, o maltratado castro, o antigo porto baleeiro de Morás e o parque da fabricación de Dolos.

En Viveiro aparte da zona vella mergullámonos no ambiemte do Resurrection Fest á hora da comida e despois, como actividade lúdica trasladámonos ao parque multiaventura para poñer a proba o noso equilibrio desprazándonos polas árbores e lanzándonos en tirolina.

Un día agotador.

As vantaxes de ser un marxinado

É dificil atopar unha pelicula que trate o tema do acoso escolar e que non resulte demoledora para o alumnado, para o profesorado e para as familias. Por isto escollemos unha na que a positividade xa emana do seu contraditorio título: "As vantaxes de ser un marxinado". O filme dá pé a esperanza e ao optimismo a pesar dos problemas propios da adolescencia ou dos que nos veñen impostos polas situacións que vivimos cotidianamente

Nada como a amizade (boa, non numerosa) para conseguir levar adiante todo canto se nos presente na vida.

IRENE REGA JUL e "A Malferida"

Para a derradeira sesión lectora do curso tivemos a sorte, grazas á xestión de David Cortizo da editorial Galaxia, de poder contar coa autora do libro que lemos nesta ocasión: "A Malferida".

A pesar da longa viaxe desde San Cibrao a autora, Irene Rega Jul, non dubidou en contestar ás preguntas e inquedanzas do alumnado e de compartir con nós, despois de escoitar as nosas, as súas motivacións e reflexións respeito ao libro: a escolla do lugar onde se desenvolve a acción, as diferentes temáticas que nel podemos atopar, o porque do tema central, a importancia do papel de cada unha das persoas protagonistas...

O coloquio xirou fundamentalmente en torno á temática do acoso escolar e puxéronse sobre a mesa as diferentes reflexións das persoas implicadas neste feito: alumnado, profesorado e familias.

Deu para un bo debate e chegamos á conclusión de que para o alumnado é dificil comunicalo e evitalo, para o profesorado é complicado percibilo e para as familias é complexo xestionalo. Moito máis agora que a maior parte destas actuacións realízanse a través das redes sociais. Tamén se nos ocorreron posibles maneiras de enfrontalas.

Un tempo ben invertido!.

"Caída en picado"

Como o eixo de traballo deste ano da biblioteca é sobre a Auga e para o venres hai planificado a visualización de diferentes videos con esta temática, dende o club de lectura quixemos destacar outro dos temas importantes do libro lido neste trimestre, o da distopía.

E para isto decantámonos por ver un episodio de Black Mirrow, unha serie que en palabras do seu propio creador reflicte á sociedade na que podemos chegar a vivir se, tecnolóxicamente, somos zoupóns.

Eliximos para ilustrar esta realidade o episodio chamado "Nosedive" que mostra ata que punto o móbil e as redes sociais poden chegar a controlar e determinar a nosa vida.

Un pouco de miedito si que dá!

Be Water

Be Water de Antía Yáñez é unha distopía que mostra unha sociedade xerárquica e desigual baixo un réxime político totalitario no que o elemento de control e ese que resulta imprescindible para a vida humana, a auga. Auga que escasea debido ao Gran Cataclismo, que fixo que a humanidade se tivera que refuxiar baixo terra en estruturas elípticas semellantes a colmeas.

Pero en toda distopía sempre hai lugar para a esperanza, representada por as dúas mulleres que ligan a todos os protagonistas do libro: a Avoa que viviu na "era superficial" e a bisneta que vivirá sen dúbida de novo na superficie.

O ecoloxismo, o totalitarismo, a desigualdade social e de xénero, os estereotipos, o papel da muller, a transmisión de valores, a maternidade adolescente, o sexo por obriga ou por pracer, ... son só algúns dos temas que trata a obra en maior ou menor medida.

Hai a quen lle gustou máis e a quen lle gustou menos. Sexa como for, deu para falar un bo rato.

The Shape of Voice

É o título en inglés do filme xaponés do ano 2016 que está baseado no manga "A silent Voice", e que visualizamos na derradeira sesión do Club de Lectura deste ano 2023.

Unha historia dura e triste pero que, ao final, como suele ser habitual, acaba ben. Como durou todo o intervalo do mediodía non puidemos comentar nada na sesión. Tería sido interesante. Cuestión de retomalo para o ano ( a ver se nos acordamos de algo). 

A SILENT VOICE 1 e 2

Comezamos o curso este ano cunha comida de confraternización entre os integrantes do club de lectura e máis do grupo do teatro xa que algún alumno e algunha das profesoras implicadas pertencen aos dous grupos. Tan rico estaba todo e tanta fame tiñamos que ninguén se acordou de sacar unha foto que ilustrara o momento.

Este ano voltamos a ter un único club integrado por cinco alumnos e unha alumna de 2º a 4º de ESO.

Comezamos cun manga, A Silent Voice, tomo 1 e 2. Gustounos moito aínda que aquí notouse a diferencia xeracional entre o alumnado e as profesoras que forman parte do club. A estas últimas resultoulle máis complicado de ler e de entender.

Deu para un debate intenso sobre os protagonistas, as motivacións e as actitudes das diferentes personaxes ante o acoso escolar. Quedamos con ganas de seguir lendo os tomos seguintes que, en breve, estarán a disposición para todo o mundo na biblioteca.

GUÍAS de LECTURA: curso 2022-2023

 

Por se fosen de utilidade, deixamos os enlaces aos materiais elaborados este ano: guías de lectura e cine así como das dúas viaxes realizadas polo Club.

GUÍAS dos LIBROS:

• EL RASTRO BRILLANTE DEL CARACOL.
• UN DE NÓS MENTE
• O MISTERIO DE PORTOMARÍN

GUÍA da PELÍCULA

• ESPECIALES

GUÍAS das VISITAS CULTURAIS

• EXPOTAKU ´22
• CAMIÑADA pola MEMORIA: LUGO E PORTOMARÍN

CAMIÑADA pola MEMORIA: Lugo e Portomarín

 Trala lectura do libro de Antía Yáñez, decidimos achegarnos no remate do curso -nun caloroso 27 de xuño- ata Portomarín. Xunto co alumnado pertencente ao Club de Teatro, os Laretas aproveitamos a viaxe para dar un paseo pola Muralla Romana de Lugo e achegarnos ó Vello Cárcere (visita moi recomendable, por certo!)

En Portomarín, tivemos unha "cicerone" de excepción: Candela, alumna do IES Fernando Blanco de Cee e filla do último bebé nacido no vello Portomarín. Con ela revivimos as historias que oira aos seus avós a trasladámonos ós lugares nos que transcorre a acción de "O misterio de Portomarín".

Preme na imaxe para ver o vídeo que recolle distintos momentos da nosa viaxe.

ANDAMOS A LER... "O MISTERIO DE PORTOMARÍN"

 

 

 

O MISTERIO DE PORTOMARÍN é a noveliña de Antía Yáñez que propuxemos para a vindeira reunión do club o día 25 de abril. Para ir abrindo o apetito lector deixamos este "booktrailer" elaborado pola rapazada do IES de Mugardos. 

Comezamos un ano máis!!

Iniciamos o curso 22-23 cun único grupo no Club de lectura formado por 8 rapazas e rapaces de 1º a 3º ESO. BENVIDAS e BENVIDOS !! . Vi ser un grupiño reducido pero que ven con moita forza e moitas gañas de ler e descubrir títulos interesantes... como este!

 

" El rastro brillante del caracol" de Gemma Lienas foi primeira lectura seleccionada para este curso: trátase dun interesante "thriller"  no que se mestura a relación de Sam, un rapaz con síndrome de Asperger e cun talento excepcional para todo o que ten que ver cos ordenadores, con Martina.

Para ir facendo boca, deixamos este vídeo no que a propia autora do libro fala del sen desvelar detalles importantes da trama.

GUÍAS de LECTURA: CURSO 2021-22

 

Estes foron os títulos lidos neste curso nos dous grupos do Club. Quedan aquí os triticos que elaboramos con información e cuestións sobre os libros por se lle interesan a alguén. 

Tamén incluimos a guía da película vista no primeiro trimestre e o trítico do roteiro literario que acompañou á nosa visita a Pontevedra no mes de abril.

1. Guías dos LIBROS

• INVISIBLE
• SANTOAMARO 
• VELLOUCAS E MINCHAS
• OS CORPOS INVISIBLES 
• OS RAPACES NON CALCETAN (EN PÚBLICO) 
• A IRA DOS MANSOS 

2. Guía da PELÍCULA 

• UNO PARA TODOS
  

3. Guía da SAÍDA CULTURAL a PONTEVEDRA

• CAMIÑADAS LITERARIAS: PONTEVEDRA
   

GUÍAS de LECTURA (Curso 20-21)

 Deixamos aquí os enlaces a cada unha das guías correspondentes ós libros, películas e roteiro levado a cabo este curso no Club.

              1. Guías dos LIBROS

§   Prohibido leer a Lewis Carroll

§   O que sei do silencio

§   As flores radioactivas

§   Memoria do silencio

§   Denébola, aRoxa

§   A caixiña dos rancores

2.  Guías das PELÍCULAS

§   Cobardes

§   JoJo Rabbit

3.  Guía da SAÍDA CULTURAL  a RIBADAVIA  Roteiro da MEMORIA